आज मुलुकभर माघे संक्रान्ति पर्व मनाइँदै

माघ १

आज परम्परागत माघे संक्रान्ति पर्व मुलुकभर घिउ, चाकु र तरुललगायतका परिकार खाएर मनाइँदै छ । आजदेखि सुर्य धनु राषीबाट मकर राषीमा प्रवेश गर्ने भएकाले माघे संक्रान्तिलाई मकर संक्रान्ति पनि भन्ने चलन छ । माघे संक्रान्तिको अवसरमा चितवनको देवघाट, सुनसरीको बराहक्षेत्र, नुवाकोटको देवीघाट, बर्दियाको ठाकुरद्वारालगायतका स्थानमा स्नान गर्नेको बिहानैदेखि घुइँचो लागेको छ । ती स्थानमा हिजो राति नै जाग्राम बसेर दर्शनार्थीले पाठपूजा गरेका थिए । आजको दिन पारिवारिक सदस्य, आफन्त तथा साथीभाई सँगै बसेर गएराति नै पकाइएको तरुल, चाकु, लड्डु तथा घिउलगायतका मीठामीठा परिकार खाएर रमाइलो गर्ने चलन छ ।

थारु, मगर र छन्त्याल समुदायल भने नयाँ वर्षको रुपमा माघी पर्व धुमधामसँग मनाउँदैछन् । पश्चिम तराइका दाङ, बाँके, बर्दिया र कैलालीलगायत जिल्लामा माघीको विशेष रौनक छाएको छ । माघी पर्वकै अवसर पारेर राजधानीको टुँडिखेलमा थारु महोत्सवको आयोजना गरिएको छ । यस्तै बर्दियाको ठाकुरद्वारामा पश्चिम तराइका विभिन्न जिल्लाबाट आएका थारु समुदायको घुइँचो लागेको छ । माघी पूजा तथा स्नानका लागि बर्दियाका साथै दाङ, बाँके तथा कैलाली जिल्लाबाट थारु समुदाय ओइरिएको छ । ठाकुरद्वारामा आजदेखि तीन दिनसम्म लगातार माघी मेला लाग्ने गर्दछ ।

यसैबीच माघे संक्रान्ति तथा माघी पर्वको अवसरमा शुभकामना सन्देश दिँदै राष्ट्रपति डा. रामवरण यादवले सबै नेपालीमा सुख, शान्ति र समृद्धिको कामना गर्नुभएको छ । सन्देशमा राष्ट्रपतिले माधीजस्ता पर्वले नेपालीहरुबीच धार्मिक र सांस्कृतिक एकता कायम गर्न मद्दत पुर्‍याउने विश्वाससमेत व्यक्त गर्नुभएको छ । सरकारले यसै वर्षदेखि माघे संक्रान्तिलाई राष्ट्रिय पर्व घोषणा गरेको छ । राष्ट्रिय पर्व घोषणासँगै आज मुलुकभर सार्वजनिक बिदा दिइएको छ । मन्त्रिपरिषदको बिहीबारको बैठकले माघे संक्रान्तिलाई राष्ट्रिय पर्वको मान्यता दिने निर्णय गरेका थियो ।

साभार : अनलाइन खबर