सिन्धुलीमा चटपटे व्यवसाय फस्टाउँदै

मंसिर १२

सिन्धुलीमा चटपटे व्यवसाय फस्टाउँदै गएको छ । सदरमुकाममा मात्रै करिव एक दर्जनको हाराहारीमा चटपटे व्यवसायीहरु छन् भने सदरमुकाम वाहिर पनि प्रत्येक टोलटोल तथा चोकचोकमा यो व्यवसाय गर्नेहरु उत्तिकै छन् । सिन्धुली माडिवजारमा विगत २० वर्षदेखि चटपटे व्यवसाय गर्नेहरु अहिले पनि सोहि व्यवसायमा तल्लिन छन् । माडिवजारको वस काउन्टर नजिकै, शान्तिनगरचोक, रातमाटा, २ नम्वर वजार, माझिटार, ढुंग्रेवास, मिलनचोक, पानीट्यांकी, धुरावजार देखि गाविसका प्रत्येक टोलटोलमा समेत चटपटे व्यवसाय सुरु भएको छ । चटपटे व्यवसायवाट मासिक १० देखि १५ हजारसम्म आम्दानि हुने गरेको केहि चटपटे व्यवासायिहरुको भनाई छ । यहि व्यवासयवाट परिवार पालेर पनि सदरमुकाममा जग्गा किनेको चटपटे व्यवसायी धु्रव शाहले वताउनुभयो । अमिलो पिरो प्राय सवैले मन पराउने हुनाले चटपटेमा सवैको ध्यान जान्छ । 

तर त्यसमा प्रयोग गरिने केहि सामानहरुले स्वास्थ्यमा पनि उत्तिकै असर गर्ने भएकाले त्यस्ता वस्तुहरु प्रयोग गर्न नहुने चिकित्सकहरुको भनाई छ । साथै चटपटे व्यवासायिहरुले सरसफाईमा ध्यान दिनुपर्ने उपभोक्ताहरु वताउँछन् । त्यस्तै सर्लाही ईश्वरपुरकी एक महिलाले चटपटे व्यवसायबाट राम्रो आम्दानी गरिरहनु भएको छ । तीन वर्षदेखि चटपटे व्यवसाय गर्दै आउनुभएकी ४५ वर्षीय निरमाया परियारले महिनामा १० हजार रुपैयाँ आम्दानी गरिरहनु भएको छ । तीन वर्षअघि अल्सर रोगबाट पीडित श्रीमानको उपचारमा खर्च भएको ४० हजार रुपैयाँ पनि आफूले चटपटे बेचेरै तिरेको परियारले बताउनुभयो । चटपटे बेचेरै फुलजोरमा उहाँले १० धुर घडेरी समेत जोड्नुभएको छ ।