काठमाडौ, आश्विन २
नेपाली चलचित्रकर्मीका लागि आइतबार महत्त्वपूर्ण दिन सावित भयो । चलचित्र विकास बोर्डले असोज १ गते राष्ट्रिय चलचित्र दिवस मनाउने निर्णय गरेपछि उनीहरू पहिलोपटक दिवसका लागि जुटे । बिहान प्रभातफेरीसँगै सभा गरे, साँझ वसन्तपुरमा दीपावली । नयाँ र पुराना पुस्ताका चलचित्रकर्मी बिहान आठ बजे नेपाल प्रज्ञा प्रतिष्ठान पुगेका थिए प्रभातफेरीका लागि । दिवसकै नाम अंकित टिसर्ट लाएका चलचित्रकर्मीको र्याली पुतलीसडक हुँदै रत्नपार्कस्थित शान्तिबाटिका पुगेर सभामा बदलिएको थियो ।
र्यालीमा पुराना पुस्ताका हरिप्रसाद रिमाल, सुभद्रा अधिकारी, जयनेन्द्र चन्द ठाकुर, पवन मैनाली, भीमबहादुर थापादेखि नयाँ पुस्ताका झरना थापा, श्रीकृष्ण श्रेष्ठ, आकाश अधिकारी, पुजना प्रधानसम्म थिए । सभामा बोर्डका संस्थापक अध्यक्ष यादव खरेलले कलाकर पार्टीको नहुने बताउँदै व्यावसायिकताका लागि राजनीतिक नहुन सुझाए । सरोकारवाला संघ/संस्थाका अध्यक्षहरूले समेत बोलेका कार्यक्रममा बोर्डका अध्यक्ष गणेश भण्डारीले आउँदो वर्षबाट यही दिन राष्ट्रिय चलचित्र पुरस्कार समेत दिने बताए ।स्रोत : ईकान्तिपुर डट कम
Comments