सिग्नेचरको बोतलमा नक्कली मदिरा

ललितपुर, भाद्र २८ 

बजारमा ब्रान्डेड बोतलमा नक्कली मदिरासमेत बिक्री हुने गरेको भेटिएको छ । प्रहरीले ललितपुरग्वार्कोको सिन्धु ट्रेडिङ एन्ड सप्लायर्सको गोदाममा छापा मारी सिलबन्दी र स्टिकरबिनाका सिग्नेचरका बोतल बरामद गरेको हो ।गोप्य उजुरीका आधारमा छापा मारी मदिरा बरामद भएको ललितपुर प्रहरी परिसरका नायब उपरीक्षक रमेश बस्नेतले बताए । 'बरामद भएको बोतल छानबिनका लागि आन्तरिक राजस्व विभागमा पठाएका छौं,' उनले भने, 'त्यसबाट छानबिनपछि थप कारबाही अघि बढ्नेछ ।' बरामद मदिरा करिब एक लाख रुपैयाँ बराबरको भएको प्रहरीको भनाइ छ । सप्लायर्सका सञ्चालक सिन्धुपाल्चोकका तारानाथ दुलाललाई प्रहरीले नियन्त्रणमा लिएको छ ।

बरामद भएका सिग्नेचर ब्रान्डका अधिकांश बोतलमा स्टिकर छैन भने केहीमा उक्किएको छ । भएका स्टिकर समेत अस्वाभाविक ढंगले टाँसेर अड्याएको भेटिएको एक प्रहरीले बताए । 'सही ढंगले बिक्री गरेको सक्कली मदिरा हुँदै होइन, सक्कली बोतलमा नक्कली मदिरा राखेको हुन सक्ने आशंका छ ।'बरामद भएकोमा सिग्नेचर क्वाटर बोतल ४८ थान, भोड्का ७५० को १४ थान, रोयल स्टेग १ सय ५० थान, गिलमेरी ४८ थान लगायत छन् । यसैगरी ब्लुरिवन, जिन र विभिन्न कम्पनीको बियरसमेत प्रहरीले बदामद गरेको छ । 'स्टिकर अस्वाभाविक देखिएकाले नियन्त्रणमा लिनुपरेको हो,' बस्नेतले भने, 'राजस्वले पुष्टि गरे यो जनस्वास्थ्यमाथिको ठूलो लापरबाही हो, त्यही अनुसार कारबाही प्रक्रिया अघि बढ्छ ।'

प्रहरीले डिस्टि्रब्युटरको ग्वार्कोस्थित गोदाममा समेत सिलबन्दी गरेको छ । ललितपुरका हरिसिद्धि, ठैव, चापागाउँ, काठमाडौंको फर्पिङ, सुन्दरीजल लगायत ग्रामीण भेगमा कारोबार बढी हुने भेटेकाले थप शंकास्पद भएको प्रहरीको भनाइ छ । ब्रान्डेड कम्पनीको सक्कली बोतल संकलन गरेर घरेलु मदिरा राखेर बिक्री गरेको हुन सक्ने आशंकामा छापा मारेको प्रहरीको भनाइ छ । तर आरोपित दुलालले भने वितरक कम्पनीबाट नै स्टिकर उक्केको कार्टुन आफूले ल्याएको भन्दै ठगी नगरेको दाबी गरे । 'कार्टुन खोल्नासाथ स्टिकर आफै टाँसिएर उक्किन्छ,' उनले भने ।

स्रोत: ईकान्तिपुर डट कम