महानायक अब 'हिरो टर्न्ज भिलेन'

मंसिर ३,

राजेश हमालले खेलेका दुई सय ८० सिनेमा र उनको भूमिकाबीच के समानता छ ? सायद हाजिरीजवाफको उत्तर भए दिइने सजिलो उत्तर हो –'हिरो' । दुई दशकभन्दा लामो अभिनय करियरमा महानायकले सबैमा नायकको भूमिका निर्वाह गरेका छन् । तर, त्यो उत्तर अबको केही महिनापछि सोधिने हो भने गलत पनि ठहरिन सक्छ । 

कारण –हमालले सम्भवतः पहिलोपटक करियरमा भिलेनको रुपमा सिनेमा अभिनय गर्दैछन् । सुनिल मानन्धरको अपकमिङ दोस्रो प्रोजेक्ट ‘मायाज बार’मा महानायक खलपात्र बन्दैछन् । आधुनिक भट्टी अर्थात ‘बार’को मालिकको रुपमा हमाल यो चरित्रमा देखिन लागेका हुन् । निर्माता मानन्धरले हमालको चरित्र सुहाउने भएकाले भिलेनमा उनलाई अनुबन्धित गरिएको बताए । 

मायाको भूमिका भने निशा अधिकारीले निर्वाह गर्नेछिन् । निशाको व्यस्त सेड्युलकाबीच सुटिङ गर्न लागिएको चलचित्र फेबु्रअरीबाट फ्लोरमा जाने अपेक्षा गरिएको छ । सिनेमालाई दिनेश डिसीले निर्देशन गर्नेछन् । बारकी युवतीबारे कथा आधारित छ । सँधै नायकको रुपमा हमाललाई हेर्दै आएका दर्शकले भिलेनका रुपमा उनलाई कसरी लिने हुन्, प्रतीक्षित बनेको छ ।

साभार: मेरोसिनेमा डट कम