लागू पदार्थ सेवन गर्ने रकम अनाथालयका बालबालिकालाई

पुष ४, सिन्धुली 

सुन्दा अचम्म लाग्न सक्छ, लागू पदार्थ छाडेर कसैले त्यस वापतको रकम मानवीय हितमा वितरण गरेको भन्दा। तर सिन्धुलीको पुष्पदिप अफसेट प्रेसका पुष्पराज देबकोटा र दिपेन्द्र बिक्रम कार्कीले आफूले सेवन गर्ने गरेको सुर्तिजन्य पदार्थ छाडेर त्यस बापतको रकम अनाथालयका बालबालिकाहरुलाई बितरण गरेका छन् । उनिहरुले मासिक ५०० रुपैँयाका दरले अनाथालयलाई सहयोग गर्ने वचन समेत दिएका छन् । शैलशिखर कृषक उत्थान संस्थाद्धारा संचालित शैलशिखर अनाथालयमा आश्रित बालबालिकाहरुलाई सहयोग गर्ने क्रममा उनिहरुले यस्तो रकम सहयोग गरेका हुन् । त्यसो त शैलशिखर अनाथालयमा सहयोग गर्ने क्रम सुरु भइसकेको छ । साथै उनिहरुले अनाथालयलाई सहयोग गर्न पनि सबैलाई अनुरोध समेत गरेका छन् । केहि दिन अघि स्थानीय पत्रपत्रिका तथा संचारमाध्यमहरुमा ‘अनाथालयमा बालबालिकाको बिजोग’ शिर्षकमा समाचार, सुचना तथा कार्यक्रम प्रकाशन तथा प्रसारण सुरु भएपछि अनाथालयमा सहयोग गर्ने क्रम बढेको हो । 

अनाथालयमा हाल ७ जना बालबालिकाहरु बस्दै आएका छन् । त्यसमध्ये ५ जना भगवति उच्च माविमा र २ जना गौमति नमूना उमाविमा अध्ययन गरिरहेका छन् । दुवै विद्यालयले उनिहरुलाई निःशुल्क अध्ययन गर्ने वातावरण मिलाइदिएका छन्् भने अनाथालयले उनिहरुलाई निशुल्क वस्ने खाने व्यवस्था गरेको छ । अनाथालयका वालवालिकाहरुलाई दैनिक जीवन धान्न समेत धौधौ परेकोले र सँस्थासंग रकम नभएकाले सहयोगका लागि सवैसंग अपिल गरेको शैलशिखर कृषक उत्थान संघका अध्यक्ष विष्णु देवकोटाले वताए । ‘पढ्नका लागि त दुइवटा विद्यालयले सहयोग गरेका छन् तर खान वस्नका लागि त आँफै व्यवस्था गरिदिनुप¥यो’ उनले भने । ‘कसैको बुवा छैन, कसैको आमा छैन अनि गरिवीका कारण आमा बुवा भएपनि उनिहरुले पढ्न र लाउन खान पाएका छैनन् । यसर्थ उनिहरुलाई मैले अनाथालयमा ल्याएको हुँ जसो तसो सहयोग मागेर भएपनि उनिहरुलाई वाटो देखाउने काम गर्छु’ उमेरले ६५ वर्ष काटिसकेका सँस्थाका अध्यक्ष देवकोटाले भने ।