पुष १५
सिन्धुली जिल्लाको पश्चिममा अवस्थित महेन्द्रझ्याँडी गाविस-४, हाक्पारामा आउँदो माघ १४ देखि १८ गतेसम्म पाँच दिने स्थानीय व्यापार प्रवर्धन मेला हुने भएको छ । स्थानीयबासीको पहलमा बि.सं. २०६१ साल वैशाखदेखि प्रत्येक शनिबार उक्त ठाउँमा लाग्दै आएको हाट बजारलाई विकास तथा व्यबस्थापन गर्ने मूख्य उद्देश्यले मेलाको आयोजना गर्न लागिएको हो । मेलालाई सफल बनाउन स्थानीय जनकल्याण सामुदायिक संस्थाका अध्यक्ष तथा डेन्साङ प्राथामिक विध्यालयका प्रधानाध्यापक निर बहादुर मोक्तानको संयोजकत्वमा बन्दिपुर, बिकास, ज्योती र जनकल्याण सामुदायिक संस्थाका सबै सदस्यहरु रहेको १ सय ५१ सदस्यीय मेला मूल आयोजक समिति गठन गरिएको छ । त्यसैगरी गाविस तथा जिल्लाका प्रतिष्ठित व्यक्तिहरुलाई समेटेर मेला सल्लाहकार समिति तथा विभिन्न उपसमितिहरु बनाई कार्य अगाडि बढाईएको मेला मूल आयोजक समितिका संयोजक मोक्तानले जानकारी दिनुभएको छ । 'तामाङ समुदायको महान साँस्कृतिक पर्व २८४८ औं 'डुक' ल्होछार तथा वसन्त पन्चमी र शहिद दिवसको अवसर पारेर हामीले मेला साचालन गर्न लागेका हौं र मेलाबाट स्थानीय व्यापारी तथा व्यापारको प्रवर्धन गर्ने, पर्यटकीय क्षेत्रको जानकारी दिने लगायतका उद्देश्य लिएका छौं' संयोजक मोक्तानले भन्नुभयो । मेलामा १ सय ५० वटा स्टलहरु रहने र व्यापार, मनोराजन, विभिन्न स्थानीय उत्पादनहरुको प्रदर्शनी, खेलकुद, सरस्वती पूजा, ल्होछार जागरण जस्ता कार्यक्रमहरु गरिने बताईएको छ । त्यस्तै नेपाली चलचित्रहरु 'अन्दाज' र 'नारी' तथा तामाङ चलचित्र 'लानी'को प्रदर्शनी पनि मेलामा रहने जनाईएको छ । मेलाको अवलोकन गर्न सिन्धुली, सर्लाही, रौतहट, मकवानपुर, काभ्रे तथा अन्य क्षेत्रबाट गरी करीब १ लाखको सहभागिता रहने आशा आयोजकले लिएको छ । साथमा मेलामा आफ्नो व्यापार व्यवशाय गर्न तथा कला देखाउन चाहने व्यक्ति वा संघसंस्थाहरुलाई सहभागिताको लागि अनुरोध गरिएको छ ।
Comments