वैशाख ५, सिन्धुली
source : www.sindhulidarpan.com.np
कमलामाई नगरपालिका वडा नम्बर ११ मा पञ्चायत शासनकालमा मारिएका ३ सहिदको सालिक सहितको सहिद पार्क निर्माण गर्न लागिएको छ । प्रधानमन्त्री कोषबाट सहिद पार्कका लागि १० लाख रुपैंया बजेट विनियोजन भए पनि सो पार्क निर्माण गर्न लागिएको हो । पार्कको नाम आजाद, दुर्गा र रजन सहिद पार्क नामाकरण गरिएको छ । पार्क निर्माणका भएको भेलाले सोमबार एक निर्माण उपभोक्ता समितिको गठन गरेको छ । इन्द्रप्रसाद ढुंगेल, सचिव सुमन पौडेल, कोषाध्यक्ष मञ्जु देवकोटा रहेका छन् भने सदस्यहरुमा देवराज पौडेल, घनेन्द्रबहादुर कार्की, पूर्णबहादुर खत्री, कमला वि.क, रघुपति प्रधान र यादव प्रसाद सुवेदी रहनु भएको छ ।
सालीक निर्माणको लागी नारायण प्रसाद घिमिरेको संयोजकत्वमा अनुगमन समितिको गठन गरिएको छ । समितिको सदस्यमा ऋषिराज अधिकारी, रमेश देवकोटा, सुरेश कुमार पौडेल र तिलकुमारी माझी छन् । सहिदहरु दलबहादुर रजन, ऋषि देवकोटा र दुर्गा सुवेदीको सालिक सहित बन्न लागेको पार्कमा गार्डेन, प्रतिक्षालय लगाएत निर्माण गरिने र त्यसलाई पर्खालले घेरिने अनुगमन समितिका सदस्य ऋषिराज अधिकारीले बताउनुभयो ।
उहाँका अनुसार पार्क बनाउने स्थलको सर्वेक्षण गर्न मंगलबार जिल्ला विकास समिति सिन्धुलीबाट प्राविधिक टोली त्यहाँ पुग्ने छ भने केहि दिन भित्रै निर्माणको काम सुरु हुने भएको छ । पञ्चायत विरुद्ध वामपन्थी राजनिती गरेको भन्दै ऋषि देवकोटा आजादले २०३७ फागुन १२ गते, दलबहादुर रजनले २०३७ कार्तिक १२ र दुर्गा सुवेदीले २०३६ कार्तिक १७ गते राज्यका सुरक्षाकर्मीले भिमानको चुरे जंगलमा गोली हानी मारेको थियो । ढिलै भए पनि सरकारले सहिदहरुको सम्झनामा पार्क र सालिक निर्माण गर्न लागेकोमा सहिदका परिवारले खुशी व्यक्त गरेका छन् । सहिद दलबहादुर रजनका छोरा दानबहादुर रजनले सहिदको सम्मान गर्न सरकार लागेकोमा खुशी लागेको बताउनुभयो ।
source : www.sindhulidarpan.com.np
Comments